隔牆有耳:旗袍參展 鄉議局台灣響朵(蘋果日報)

2013-04-18 10:08:49

■鄉議局議員廖書蘭身上呢件有鄉議局嘜頭嘅旗袍,將會喺台北展出。
 
鄉議局成日話要捍衞新界人傳統權益、發揚新界人文化,今勻終於得咗。今年年尾,台北會搞為期一個月嘅香港長衫文化展,同時出版本名為《香港百年長衫研究》嘅書,而鄉議局旗袍款式嘅女裝制服,最近獲得香港歷史博物館邀請到台北展出。查實鄉議局呢款旗袍,係出自鄉議局主席劉皇發千金、做設計師嘅劉玉蓮手筆;至於衫上嘅鄉議局標誌,則由做平面設計嘅香港吸煙與健康委員會主席劉文文負責。鄉議局議員廖書蘭喺新大樓開幕日着過呢件旗袍亮相,佢會借出旗袍去台北俾人任睇唔嬲。
 
鄉議局件旗袍就夠晒威嘞,但佢哋位於沙田石門嘅新大樓就差啲呢。原來大樓裏面部份電力裝置,譬如廚房個電箱,就唔符合法例規訂,搞到要大嗱嗱攞多成10萬蚊整番好。  
 
http://hk.apple.nextmedia.com/news/art/20130417/18230911